Hasiera
Lehenengo Karlistaldia (1833-1839) azken fasean zegoen 133 bilbotar ospetsuk Europako beste herrialde batzuetan agertzen hasi ziren moduko klub sozial bat sortzea erabaki zutenean.
Hala, 1839ko maiatzeko egun batean, Sociedad Bilbainako sortzaileak bildu ziren eta lehenengo zuzendaritza-batzordea izendatu zuten. Batzorde horren lehenengo zereginak klub berrirako lokal egoki bat aukeratzea eta erakundea arautzeko lehenengo erregelamendua idaztea izan ziren.
Batzordeak bilera gehiago egin zituen, baina aktak idatzi ez zituztenez, horien edukia ez da ezagutzen.
Urte artako uztailean, erakundeak Batzorde Nagusia deitu zuen beren proiektuetan egindako aurrerapenen inguruan informazioa emateko eta lehenengo zuzendaritza-batzordeak idatzitako erregelamenduaren proposamena aurkeztu zuen.
Egun batzuk beranduago, abuztuaren 31n, Bergaran Espartero eta Marotok mendeko lehenengo gerra zibilaren amaiera irudikatu zuten besarkada batekin.
Azkenik, 1839ko urriaren 15ean, Batzorde Nagusia berriro bildu zen eta honako erabaki hauek hartu zituen: erregelamendua onestea; zuzendari-batzordeko izendapenak berrestea eta horien kudeaketa onestea; Plaza Berriko 5 zenbakidun etxeko lehenengo pisua egoitza gisa onestea (75 urtez izango zen erakundearen egoitza); eta lokalaren arduraduna izendatzea. Gai guzti hauek akta batean jaso ziren, Bilboko klubaren historiako lehenengoan. Ez dakigu Sociedad Bilbaina izena prozesuaren zein momentutan hartu zen.
